GPS (The Global Positioning System) يا نړیوال ځای ښود سیستم یو باوری ځای ښودونکې وسیله ده چې په ۱۹۷۳ زیږدیز کال کې د امریکا د متحده ایالاتو دفاعي څانګې له خوا ورته پرمختګ ورکړای شو. د جي پي ایس دستګاه په اصل کې  د امریکا د عسکرو، پوځي موټرو، الوتکو او کښتیو د دقیق ځای ښودلو له پاره پکاریده، خو په ۱۹۸۰ لسیزه کې متحده ایالاتو دا وسیله د غیر پوځي کارونې له پاره  لاسرسی وکړ.
د جي پي ایس سیستم په هر ډول آب  او هوا په ټوله نړۍ کې په ۲۴  ساعته ډول شپه او روځ د نړۍ په هر ګوټ کې کاریدای شي او په کارونه یې هیڅ ډول لګښت (مصرف) نه راځي. نن سبا  جي پي ایس  کارونه د ژوند په بیلا بیلو برخو کې تر سترګو کیږي که هغه علمي یا سوداګریز ډګر دي. په سوداګریز ډګر کې د ترانسپورت، د هوایی شرکتونو، کښتې چلوونې د ځای ښودنې له پاره کارول کیږي د مثال په ډول که یو څوک  غواړي چې د جلا ل آباد نه کندوز ته لاړ شي او لاره ورته معلومه نه وي  نو جي پي ایس دستګاه به ورته دځای پر ځای شوې  نقشې له مخې لاره وښي او په لاره کې چې هر ځای  ته ورسیږي هم وښودل  شي  که په کابل کې وي یا په بغلان کې.
 په علمي ډګر کې هم جي پي ایس ځانګړې رول لري لکه د هوا پیژندنې، ځمکه پیژندنې  چې له دې پلوه د کانونو په برخه کې د هېواد د کانونو يوه ښه نقشه جوړولی شي، په بیلابیلو پروژو کې د سروې له پاره هم ښه وسیله ده  او په نور ډیر ځایونو کې ورڅخه ګټور کار اخستل کیدای شي.